Bloggið 5 ára! Besta uppskriftin? Íslensk/ítölsk kjötsósa með penne pasta, hvítlauksbrauði og insalata tricolore

 

Hef verið að velta því fyrir mér síðustu daga hvernig ég ætti að halda upp á fimm ára afmæli bloggsíðunnar minnar. Svarið kom svo til mín seinustu helgina í nóvember þegar ég var með nokkra góða nágranna í heimsókn. Ég hef síðustu þrjú árin boðið til mín góðum vinum í þessa ítölsku kjötsósu. Um hana hef ég bloggað áður, bæði gerða með nautahölum í fyrra og svo lambakjöti á árdögum þessa bloggs. Þessa uppskrift hef ég eldað sjaldnar en tíu sinnum en það er engin spurning í mínum huga að þetta sé ein sú besta uppskrift sem ég hef birt á síðunni minni. 

Annars geri ég mér vel grein fyrir því að ég hef verið latur við að blogga síðustu tvær vikur. Fyrir því eru góðar skýringar. Í síðustu viku var ég á námskeiði sem er liður í stjórnunarnáminu sem ég hóf í haust. Þetta var ansi áhrifaríkt námskeið, UGL - utveckling av grupp och ledare - og fjallaði um hópdýnamík og hvernig hægt er að stuðla að áhrifaríku samstarfi á milli hóps af fólki. Námskeiðið tók heila viku og við vorum frá morgni til kvölds að rýna í eigin tilfinningar og annarra og skoða hvernig fólk hefur áhrif hvert á annað. Virkilega áhugavert - en maður var alveg úrvinda á eftir. Kannski þetta eigi eftir að koma manni að góðum notum verði maður einhvern tíma stjórnandi. 

Vík nú aftur að blogginu mínu. Það á núna fimm ára afmæli. Það var sett á laggirnar 9. desember 2006 - og verður því fimm ára á morgun. Markmiðið var að að hvetja sjálfan mig áfram í eldhúsinu, og prófa nýja hluti. Til þess að læra meira um mat og matreiðslu hef ég ferðast um netið, í gegnum matreiðslubækur, horft á matreiðsluþætti og farið á milli landa í leit að uppskriftum til að gæla við bragðlauka mína. Ég hef birt nærri fjögurhundruð færslur - þessi er númer þrjúhundruðníutíuogsjö. Ég held að ég hafi eldað fjölbreyttar uppskriftir og nánast notað allt hráefni sem ég hef komist í tæri við. Bloggið hefur hvatt mig áfram í heimildaleit og við því að viða að mér þekkingu um vín, mat og matargerð! Ég hef fengið nærri sjöhundruðþúsund heimsóknir á Moggabloggið, yfir eitthundrað þúsund heimsóknir þegar ég var á Miðjunni og svipað núna á Eyjunni. Ég hef fengið fjölda athugasemda og margir hafa skilið eftir kveðju í gestabókinni og þær hafa glatt mig óskaplega mikið. Það er sérlega gaman að sjá að margir lesa það sem maður skrifar og fá innblástur að ævintýrum úr eldhúsinu mínu. Kærar þakkir fyrir að koma reglulega hingað í heimsókn - það eitt veitir mér endalausan innblástur að halda áfram að bæta mig í eldhúsinu! 

Bloggið 5 ára! Besta uppskriftin? Íslensk/ítölsk kjötsósa með penne pasta og insalata tricolore 

 

Svona eldamennska hefur verið í miklu uppáhaldi hjá mér lengi. Bara núna nýverið gerði ég líka uppskrift ættaða frá Frakklandi, Beuf au cocotte, eftir ráðleggingum frá einum þingmönnum Framsóknarmanna, Eygló Harðardóttur. Ekki að ég sé fylgisveinn hennar í pólitík en uppskriftin var alveg ljómandi - blogga um hana síðar. 

Eins og ég hef sagt áður er þetta alvöru matur, "old School" eldamennska með einföldu en góðu hráefni. Með því að gefa réttinum sinn tíma er hægt að gera flestan mat ljómandi góðan - jafnvel stórkostlegan!. Ekki að það þurfi neitt sérstök handtök til að gera íslenskt lambakjöt stórgott - alls ekki - en þessi uppskrift bara laðar út það besta; mýktina, áferðina, bragðið, eftirbragðið. Og í góðum félagsskap verður líka allt þeim mun betra! 

 

Eins og nefnt var áður þá er það eina sem þessi uppskrift krefst er tími! Það má eiginlega ekki elda þetta á skemmri tíma en svona 3 klukkutímum - en það þarf ótrúlega lítið af hafa fyrir þessu - Og þetta eldar sig eiginlega sjálft. Þess ber að geta að ég var að elda fyrir rúmlega tuttugu manns. 

 

Rúmlega 4 kíló af lambakjöti, mestmegnis lærisneiðar en einnig sneiddur frampartur, er þvegið og þurrkað vel. Saltað vel og piprað og látið bíða augnablik á meðan grænmetið er undirbúið og steikt.

Tveir heilir hvítlaukar er saxaður niður og sömu örlög hljóta 4-5 fremur stórir laukar - hvítir eða rauðir - það skiptir eiginlega ekki máli. 3-4 gulrætur eru flysjaðar og skornar í litla bita og einnig þó nokkrar stangir af sellerí. Stór pottur er settur á hlóðirnar og grænmetið er steikt í vænum slurk af olíu - það er sennilega óþarfi að nota extra virgin olíu til að steikja upp úr - margir kokkar segja að svoleiðis olía missi sitt sérstaka bragð við steikingu og því sé óþarfi að spandera góðri olíu í slíkt - ég nota bara það sem hendi er næst! Mikilvægt er að brúna ekki grænmetið.

Þegar laukurinn er orðin glær er kjötið sett út í og brúnað á öllum hliðum í hóflegum skömmtum - passa sig að setja ekki of mikið af kjöti í einu í pottinn - annars sýður það bara. Við viljum að það brúnist. Saltað og piprað á milli. Kjötið er sett á disk á meðan allt er brúnað - mikilvægt að passa allan safa af kjötinu - ekkert má fara til spillis! Þegar búið er að brúna kjötið hellti ég einni flösku af rauðvíni saman við grænmetið - sauð áfengið og bætti síðan kjötinu saman útí aftur.

Þá setti ég 5 dósir af góðum niðursoðnum tómötum útí og jafnmikið af vatni. 2 litlar dósir af tómatapaste er einnig sett út. Mikilvægt er að grænmetið og kjötið, sem gjarnan festist við botninn á pottinum, losni frá þegar vökvinn er settur úti.  Saltað og piprað á nýjan leik.

Ef fólk vill krydda á þessum tímapunkti er mikilvægt að nota bara kryddjurtir sem þola langa eldun eins og lárviðarlauf eða rósmarín. Ég bjó til vönd af kryddjurtum; rósmarín, lárviðarlauf, timian, majoram.

 

Suðan er látin koma upp og leyft að krauma við lágan hita  í 2-3 klukkustundir með lokið á - í þetta sinn setti ég pottinn inn í ofn, 180 gráðu heitan. Síðasta klukkutímann er potturinn settur aftur á hlóðirnar og þá er lokið tekið af pottinum og svo fær rétturinn að malla og sjóða rólega niður. Þetta þarf að sjóða niður minnst um þriðjung til helming. Það er auðvelt að sjá hvenær kjötið er tilbúið - þá fer það eiginlega sjálft að detta í sundur og renna af beinunum. Smakka - ef meiri kraft vanar í réttinn - t.d. ef lítið af beinum var með kjötinu þarf stundum að setja kraft - en yfirleitt ekki! Að þessu sinni þurfti ekkert að gera - annað en að salta og pipra!

 

Þegar rétturinn fer að verða tilbúinn er rétti tíminn til að setja fleiri kryddjurtir sem þola minni eldun eins og basil og steinselju. Skera kryddið niður og hræra saman við sósuna. Mikilvægt er að smakka sósuna til á þessum tímapunkti. Stundum eru tómatarnir súrir og þá þarf að sæta sósuna annað hvort með sykri eða jafnvel syndga með tómatsósu. Mikilvægt er að salta og pipra vel - alltaf Maldon og nýmalaðan pipar.

 

Gott pasta er soðið í miklu söltuðu vatni með smá olíu. Þegar pastað er að verða tilbúið er vatninu hellt af því - best að láta pasta í gróft sigti og hrista vatnið vel af - hafa verður hraðar hendur því pastað þarf að komast aftur í pottinn. 2-3 ausur af sósu er settar yfir pastað og hrært vel þannig að það tekur allt rauðan lit. Látið standa í tvær til þrjár mínútur. Pastað sogar inn í sig sósuna og verður alveg frábært á bragðið. 

 

Borið fram með insaltata tricolore sem er auðvitað alger klassíker - þetta er engin uppskrift sem þarf að kynna. Það er alltaf gott að bera þetta fram og ég verð aldrei leiður á því að borða þetta. Það er eitthvað við samsetninguna á ferskum mozzarellaostinum, fallegum rauðum tómatnum og svo djúpt grænu basillaufinu - einu af mínum uppáhaldskryddum. Nóg af góðri jómfrúarolíu og svo salt og pipar í gnægðum og allir sleikja útum. 

Gerðum svo einfalt hvítlauksbrauð. Skárum niður nýjar baguettur og pensluðum með hvítlauksolíu og 

röðuðum síðan mozzarellasneiðum ofaná. Bakað í ofni við 180 gráður þangað til að osturinn er bráðinn og brauðin farin að taka á sig brúnan lit.  

Við vorum með ljómandi góð vín með matnum. Svo var það skemmtileg tilviljun að ég hafði tekið tappann úr Coto de Imaz Rioja frá því 2004 og Jónas og Hrund komu með sama vín. Þetta er Coto de Imaz Rioja Reserva frá Spáni frá 2004. Merkilega góð kaup finnst mér - kraftmikið Roija vín; þykkt í glasi. Ilmur af vanillu og eik. Vínið ku hafa fengið að liggja á eikartunnum um skeið. Bragðið er gott, þétt og í því mikill ávöxtur. 

Ég vil í lokin nota tækifærið að þakka aftur öllum fyrir að kíkja við á blogginu mínu. Eins og ég nefndi hefur þessi heimasíða verið mér mikill gleðigjafi síðastliðin ár og ég vona að fólk nái að skynja það á skrifum mínum. Það er svo ári gott að drekka gott vín, elda góðan mat og svo borða!  Best er þó að gera allt þetta í góðra vina hópi. Takk fyrir mig. 

Ps. Verið ófeimin við að koma með athugasemdir eða spurningar og ef ykkur líst vel á þá er lítill "like" hnappur hér að neðan. 

  

Athugasemdir

[Eygló Harðardóttir (IP-tala skráð) 8.12.2011 kl. 19:04]

Sæll Ragnar og innilega til hamingju með afmælið.

Ætla svo sannarlega að prófa þessa. Ég er mjög áhugasöm um ítalska matargerð eftir sumarfrí á Ítalíu í fyrra. Við keyptum þar pastavél, ólífuólíu beint frá bónda í sveitahéruðum Toskana og svo var farið beint í að prófa sjálfur heima.

Gaman að heyra að þú prófaðir uppskriftina sem ég benti á.

bkv. Eygló Harðardóttir

PS: Dagný Jónsdóttir er hætt sem þingmaður okkar og svo vinnum við bara í þessu með pólitískar skoðanir þínar ;)

[Ragnar Freyr Ingvarsson, 8.12.2011 kl. 19:35]

Sæl Eygló

Ég biðst afsökunar á því að ruglast á nafninu þínu!!! Því hefur hér með verið breytt á blogginu eins og þú getur lesið hér og á eyjunni. Eldaði þessa uppskrift sem þú bentir mér á og hún var frábær! Notaði aðeins of mikin kryddpipar en það verður bara betra næst. Tók frábærar myndir og hlakka til að koma því á framfæri. Þakka þér fyrir ábendinguna! Endilega komdu með fleiri "tips".

Þó við séum ekki skoðanasystkin í pólitík getum við þó rætt saman um mat og lífsins lystisemdir - það er alltént þverpólitískt...ekki satt?

mbk, Ragnar

[Kári Freyr (IP-tala skráð) 8.12.2011 kl. 23:09]

Sæll Ragnar og til hamingju með afmælið og frábæra síðu.

Ég elda nú ekki mikið en finnst það hrikalega gaman af og til að reyna að elda eitthvað gourmet :)

Kona mín gerir mikið grín af mér að ég fer inn á síðuna þína daglega til að athuga hvort þú sért búinn að setja inn nýja færslu. Svo ef það er ekki komin ný færsla þá skoða ég bara gamlar færslur.... aftur. Það er alveg eðlilegt af 27 ára gömlum manni..eða er það ekki?

enn og aftur takk fyrir góða og skemmtilega síðu.

kv,

KF

[Edda Arinbjarnar (IP-tala skráð) 9.12.2011 kl. 18:48]

Sæll Ragnar,

Hef alltaf óhemju gaman af blogginu þínu og fæ fráhvarseinkenni þegar langt líður á milli bloggfærsla hjá þér.Verð líka að hrósa þér fyrir læknastörf, ég var nýbúin að eignast fjórða barnið mitt og kom illa haldin á fæti uppá Sólvang. Enda komin með blóðtappa. Príma umönnun sem ég fékk frá þér á þessari ögurstund, sem ég gleymi aldrei. Vona að þetta séu ekki alltof miklar upplýsingar - hef bara alltaf langað að koma þessu að :)

Bestu - Edda

[Ragnar Freyr Ingvarsson, 9.12.2011 kl. 21:10]

Sæl Edda

Ég held að þetta sé besta athugasemd sem ég hef fengið hérna á bloggið mitt. Mikið gleður það mig mikið að þú kannt að meta bloggið mitt og ennfremur að ég gat verið þér innan handar þegar þú þurftir á því að halda. Ég vona að þér og börnunum þínum heilsist vel og aftur...takk fyrir að kíkja við og vertu ávallt velkomin aftur.

Ragnar

[Óla´fia (IP-tala skráð) 11.12.2011 kl. 09:41]

Til hamingju með stórafmælið!

Frábært blogg og hvetjandi  fyrir okkur hin að fá að lesa um allar tilraunirnar. Spennandi verður að fylgjast með næstu fimm árin....

Kv, Ólafía 

[Jónína Christensen, 16.12.2011 kl. 16:16]

Til hamingju með áfangann. Er virkilega hrifin af blogginu þínu, sem ég stundum ligg yfir í uppskriftaleit.

Ég er að hugsa um að elda jólakalkúninn þinn, en er í vandræðum þar sem ég nota aldrei svínakjöt, og þarf þess vegna að finna eitthvað annað en svínahakk í fyllinguna.... Áttu gott ráð ?

Kveðja frá Danmörku, Jónína

[Ragnar Freyr Ingvarsson, 18.12.2011 kl. 19:30]

Sæl Jónína

Hvernig væri bara að prófa eitthvað villibráðarhakk - dádýr og fitubæta það á einhvern hátt. Er með kalkúnafærslu í vinnslu núna og skelli henni í loftið í vikunni fyrir jól.

mbk, Ragnar

[Anna Guðný Aradóttir (IP-tala skráð) 20.12.2011 kl. 15:54]

Sæll og blessaður

Prófaði kjötsósuna þína með íslensku lambakjöti og hún er snilld, takk fyrir !

Jólakveðjur, Anna