Gómsæt Galette pönnukaka með osti, skinku og steiktu eggi á erfiðum laugardagsmorgni

laekjarkot.jpgÞað var gott að koma heim til Svíþjóðar aftur. Þetta var ansi hressilegt frí á Íslandi þessa daga - ef frí skyldi kalla. Hittum nærri alla bæði vini og fjölskyldumeðlimi og það var einstaklega ljúft að sjá alla aftur. En það er full vinna að vera að hitta fólk alla daga - mörgum sinnum á dag. Einn daginn fékk ég þrjá hádeigisverði - sem ef maður væri Hobbiti væri fullkomið, en fyrir þann sem langar að komast niður beltisgat er þetta þungur róður! En þetta var allt gaman samt sem áður - en ekki var mikið um hvíld þessa viku. Það má segja að maður hafi hvílt sig í vinnunni þessa síðustu vikuna. En það var samt indælt að koma á frónið - þessa ljósmynd tók ég síðasta sunnudagsmorgun í Lækjarkoti þegar við vorum að leggja í hann á leið á flugvöllinn. Það er ekki leiðinlegt að fylla hugann með minningum sem þessum. Fátt er fallegra en íslensk fjöll!

Bróðir minn, Kjartan, kom í heimsókn frá Köben og við erum búin að eiga ljúfa helgi hérna saman. Á fimmtudagskvöldið gerðum við íslenskt slátur - soðna og steikta lifrarpylsu og kartöflumús. Virkilega ljúffengt. Í okkar fjölskyldu er vaninn að bera fram rifsberjasultu með steiktu lifrarpylsunni - fyrir þá sem hafa ekki prófað þá er það sérstaklega ljúffengt...ég lofa!Á föstudaginn vorum við með ekta "comfort" mat - entrecote með ekta bernaise, hef bloggað um slíkt áður - sjá hér. Eftir matinn fórum við svo í næsta hús - til Signýjar Völu og Þóris manns hennar. Hún var með systur sína í heimsókn og pabba sinn. Það var dregin upp ákavítisflaska og þá fer sem fer. Morguninn eftir var því þörf á steiktu eggi - stundum krefur líkaminn bara um slíkt. Þá jafnar maður sig fyrr. Við fórum síðan í góða gönguferð um bæinn. Um kvöldið vorum við svo með lambahrygginn sem ég hafði smyglað frá Íslandi, fylltur núna með rósmarín og timian og niðursneiddum hvítlauk með sveppasósu a la mamma með rótargrænmeti, ekkert ólíkt því sem ég gerði síðustu viku, sjá hér. Í kvöld var svo flatbaka með afgöngum. Ljúffengt!

Annars var ég líka að sýsla við að gera kindakæfu eftir leiðbeiningum Helgu Sigurðardóttur úr bókinni - Matur og Drykkur - en breytti aðeins útaf með því að nota ekki mör og í stað þess mun minna magn af smjöri, meira af pipar og svo setti ég einnig hvítlauk í mína uppskrift. Sjáum hvernig rætist úr þessu.

 Gómsæt Galette pönnukaka með osti, skinku og steiktu eggi á erfiðum laugardagsmorgni

galette_a_ponnu-1.jpgÞessi réttur sameinar ást mína á pönnukökum - sérstaklega crepes, bræddum osti og steiktu eggi. Fyrir mat á föstudaginn var ég að blaða í bók sem heitir Culinaria France og þar rakst ég á þessa uppskrift. Samkvæmt uppskriftinni í þeirri bók var kveðið á um að nota "buckwheat" sem að ég held að sé bókmjölshveiti - alltént þýðist það yfir á bovete og boghvede á sænsku og dönsku - ef ég hef rangt fyrir mér þá óskast leiðréttingar. Bókmjölshveiti er unnið úr grastegund ekki hveititegund ef ég hef skilið literatúrinn nógu vel. Þessi grastegund á uppruna sinn að rekja til Austurlanda og tóku Evrópubúnar vel á móti henni þar sem hún óx bæði hratt og var harðger. En hvað um það.

galette_a_diski_931045.jpgÉg átti ekkert bókmjölshveiti, þannig að ég blandaði bara saman venjulegu hvítu hveiti og grahamsmjöli, síðan skvettu af salti, olíu, smá lyftiduft, tvö falleg egg og svo næg mjólk og úr varð þetta fallega pönnukökudeig. Pönnukökupannan er hituð og við hliðina önnur til þess að steikja eggið. Þá er deigið sett á pönnuna í fremur þunnu lagi og á sama tíma er eggið sett á hina. 

Samkvæmt uppskriftinni á kokkurinn að setja hreina fitu á pönnukökuna þegar búið er að snúa henni en ég ákvað í stað þess að setja ost, síðan nokkrar sneiðar af skinku og þvínæst er eggið sett ofaná. Brotið upp á kantana og steikt áfram þangað til að allt er orðið fallega brúnt. Borið fram með rjúkandi kaffi og góðum appelsínusafa. 

Annars hef ég mikið verið að spá í bíómyndir þar sem matur leikur eitt af aðalhlutverkunum eftir að ég sá sýnishornið af Julia&Julie. Mér hefur dottið í hug mynd Stanley Tucci - Big Night, danska myndin Babette's gestebud, teiknimyndin Ratatouille, og svo Like water for Chocolat. Ef lesendum dettur fleiri myndir í hug væri ég þakklátur fyrir athugasemdir. 


« Síðasta færsla | Næsta færsla »

Athugasemdir

1 identicon

La Grande Bouffe er fronsk fyrirtaksraema fra ca 1980 um nokkra midaldra menn sem eru leidir a lifinu og akveda ad eta sig til dauda.

Burkni (IP-tala skráð) 8.11.2009 kl. 22:31

2 identicon

Þetta er einfaldlega kallað bókhveiti á íslensku, ekki bókmjölshveiti.

Anna R (IP-tala skráð) 9.11.2009 kl. 00:27

3 identicon

Ekki má gleyma þeirri frábæru mynd Tampopo!

Jóhanna (IP-tala skráð) 9.11.2009 kl. 08:44

4 identicon

Takk fyrir frábært matarblogg

vildi benda þér á hina frábæru mynd "Eat drink man woman", leikstýrð af Ang Lee og kom út 1994

Ágústa (IP-tala skráð) 9.11.2009 kl. 10:12

5 identicon

Namm namm, nú langar mig bara til Frakklands og kaupa eina jambon-fromage crêpe af götusalanum...

Svo má ekki gleyma hinni frábæru mynd Peter Greenaway "The Cook, the Thief, His Wife & Her Lover" frá 1989.

Ella (IP-tala skráð) 9.11.2009 kl. 11:59

6 identicon

Sæll Ragnar

Alltaf gaman að fylgjast með blogginu þínu og oftar en ekki eru munnvatnskirtlar á yfirsnúning eftir lestur þess.

La Grande Bouffe (Átveislan mikla eins og hún hér í ísl. þýðingu) er kannski frekar ódönnuð mynd þó svo að hún sé sannanlega óður til franskrar matargerðar. 

En varðandi Galette pönnukökuna og hveitið í henni þá finnur þú það t.d. í þáttum Rick Stein "Ricks Stein's French Odysse" en þá getur þú t.d. fundið hér:  http://www.mininova.org/tor/2895886

Ein spurning að lokum.  Reykofninn þinn,  hefur þú séð hann til sölu hér heima?

Kveðja

Guðmundur

Guðmundur Magnússon (IP-tala skráð) 9.11.2009 kl. 17:11

7 Smámynd: Ragnar Freyr Ingvarsson

Sæl öllsömul og takk fyrir góðar ábendingar. Kíki á þessar myndir.

Varðandi reykofnin þá verð ég að viðurkenna að ég skoðaði ekki íslenskar heimasíður. 

Án efa geta þeir sem eru með Weber grill pantað inn Weber Smokey Mountain fyrir sína kúnna. Annars get ég ráðlagt hotsmoked.co.uk - fín þjónusta sem ég fékk þar. Tók ekki nema 5 virka daga að fá sent frá UK. 

Svo er í raun fremur einfalt að búa til reykofn. í Bók Keith Erlandson - Home smoking and Curing eru margar leiðbeiningar hvernig á að reykja mat - hægt að búa til úr pabbakössum - gömlum ísskápum og hvaðeina. Teikningar er hægt að nálgast á netinu. 

Svo er líka möguleiki að skella sér á Bradley home smoker - þeir eru með eigin heimasíðu. Ástæða þess að ég valdi hann ekki var vegna þess að ég vildi ekki vera háður einhverju fyrirtæki með reykpellets (sérhannað fyrir þessa gerð) - ég vildi gjarnan geta notað hvaða við sem ég finn hérna í grenndinni og þurrka og einnig hafa möguleika að nota reykofnin bara sem venjulegt kolagrill. En þeir virðast ansi flottir. 

mbk, Ragnar

Ragnar Freyr Ingvarsson, 9.11.2009 kl. 18:43

8 Smámynd: Ragnar Freyr Ingvarsson

pabbakössum átti náttla að vera pappakössum!

Ragnar Freyr Ingvarsson, 9.11.2009 kl. 18:44

9 Smámynd: Hildigunnur Rúnarsdóttir

Er ekki grahamsmjöl bara heilhveiti?

Hildigunnur Rúnarsdóttir, 10.11.2009 kl. 08:36

10 identicon

Ekki gleyma 'The Dead' eftir James Joyce.  Á námsárum mínum í Kanödu gerði ég einmitt ritgerð um hvernig tónlistin og maturinn spiluðu saman.

Magnús (IP-tala skráð) 10.11.2009 kl. 11:06

11 identicon

Sæll Ragnar. Ég er ein af þeim sem les bloggið þitt reglulega og hef mikla ánægju af. Ég geri kæfu á hverju ári og er löngu hætt að hafa fitu í henni, hreinsa alla fitu úr og mauka í matvinnsluvél og bæti soði til að fá hana mýkri. Ég nota lauk og hvítlauk ásamt því kryddi sem mér finnst gott. Hún skemmist aldrei, er alltaf búin áður

Elín Gísladóttir (IP-tala skráð) 10.11.2009 kl. 15:58

12 identicon

Hæ Ragnar!!!

Alltaf gaman að sjá bloggið þitt...ég bara verð að benda aftur á þessa frábæru mynd "Eat, drink, man, woman"...sérstaklega byrjunaratriðið sem er uppáhalds!!! 

Og af því að ég er nörd dauðans verð ég að benda á að bókhveiti er ekki af grasaætt eins og hveiti, heldur tilheyrir sínum eigin flokki (Polygonaceae)!

Ástæðan fyrir því að ég hef svona undarlegan áhuga á korntehgundum er að ég bjó í Garfagniana héraðinu á Ítalíu í nokkra mánuði, en þar er einn fárra staða í heiminum þar sem enn er ræktað hið "upprunalega" hveiti, Emmer eða Farro (triticum dicoccum) sem ma hefur fundist í gröfum faraóanna og í forn Ísrael...  Réttir úr þessu hveiti eru lókal sérréttir og þeir verða alveg vittlausir þegar því er ruglað saman við frænda þess spelt sem kom seinna fram á sjónarsviðið og er líklegast afbrigði af venjulega hveiti, þessum tegundum er oft ruglað saman og margt af því sem sagt er um spelt á í rauninni við farro...

Bókhveitið var mjög útbreytt sérstaklega í Rússlandi, það vex án þess að þurfa áburð og vék mjög þegar tilbúinn áburður gerði ræktun á hveiti og öðrum korntegundum auðveldari...en ef maður ættlar að gera alvöru bliniz þarf bókhveiti...og japanskar soba núðlur eru úr bókhveiti...svo það lifir!  Og er líklega alveg meinholt, sérstaklega fyrir fólk með sýkursýki II...bendi aftur á Wikipedia fyrir frekari upplýsingar...

Bless, og takk fyrir góðar uppskriftir!!!

Ása Eiríksdóttir (IP-tala skráð) 12.11.2009 kl. 16:22

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband