Hin heilagi kaleikur bandarískrar grillmennsku; Ljúffengur brisketborgari með nýju hrásalati

 

Þessi biti er einn af hornsteinum bandarískrar grilleldamennsku. Það eru til óteljandi uppskriftir og myndbönd á youtube um hvernig á að meðhöndla þennan annars ólseiga kjötbita og umbreyta honum í dásemd eins og þess. Ég hef gert atlögu að þessum bita nokkrum sinnum og það tók mig nokkur skipti að læra að ná tökum á uppskrifinni. En ég held að ég hafi hitt í mark með þessari aðferð. 

 

Ég verð að fá vitrari menn/konur en mig til að hjálpa mér að íslenska nafnið á þessum kjötbita - Brisket - sem kemur af framanverðu nautinu. Myndin hér að ofan sýnir vel hvaðan hann er tekinn af kúnni. Vöðvinn inniheldur meðal annars brjóstvöðvann af kúnni og er, sé hann snöggeldaður, afar seigur undir tönn. En með því að langelda hann við lágan hita í hálfan dag eða svo umbreytist hann í lungamjúkan bita sem er ljúffengur, safaríkur og seiðandi undir tönn. Prófiði bara. 

 

Annars hefur verið nóg um að vera hjá okkur síðustu daga. Við erum að undirbúa flutning til Íslands. Tengdamóðir mín, Hrafnhildur, flaug til okkar fyrir rúmri viku síðan og hefur heldur betur verið okkur innan handar. Hún hefur séð um yngstu dótturina auk þess að byrja að pakka búslóð okkar í Englandi niður í kassa. Það er gott að eiga hauk í horni. Og við eigum marga slíka. Svo hefur svilkona mín, Inga Dóra, og mágkona mín, Kolbrún, sannarlega verið okkur góðar. Inga Dóra hefur haft auga með iðnaðarmönnum sem hafa verið að vinna í húsinu okkar í Ártúnsholtinu. Hún er meira að segja að flísaleggja eldhúsgólfið hjá okkur. Foreldrar mínir hafa líka verið ótrúlega duglegir. Þau skipulögðu móttöku á innbúinu okkar frá Svíþjóð í fjarveru okkar. 

 

Ég keypti Bosch rafmagstæki í eldhúsið sem ég hlakka til að sýna ykkur þar sem að við áttum engin (allt slíkt er selt með fasteignum í Svíþjóð) auk þess sem ég er að láta sérsmíða borðplötur hjá Fanntófell á eldhúsinnréttinguna og eyjuna sem við erum að hanna. Ég hlakka svo til að komast í að elda í alvöru eldhúsi aftur sem er hannað eftir mínum þörfum. Það verður gaman að sýna ykkur í komandi bloggfærslum hvernig miðar. 

 

Hin heilagi kaleikur bandarískrar grilleldamennsku; Ljúffengur brisketborgari með nýju hrásalati

 

Eldamennskan sem um ræðir er í raun ofureinföld þó að hún taki talsverðan tíma. Til að verkið verði leikur einn þarf bara að raða kolunum upp með ákveðnum hætti og svo sér tíminn eiginlega bara um restina. 

 

Fyrir sex til átta

 

2 kg nautabrisket

2 msk jómfrúarolía

4 msk uppáhalds grillnuddið ykkar

150 ml grillsósa að eigin vali

hamborgarabrauð

laukur, tómatar, pæklaðar gúrkur eftir smekk. 

 

Fyrir hrásalatið

 

1/2 haus hvítkál

2 gulrætur

1 mangó

3 sellerísstangir. 

3 msk majónes

2 msk sýrður rjómi

75 ml appelsínu/eplasafi

safi úr heilli sítrónu

börkur af heilli sítrónu

salt og pipar

 

 

Nuddið kjötið með jómfrúarolíu.

 

 

Útbúið grillnuddið. 

 

 

Nuddið kjötið vandlega með kryddblöndunni.

 

 

 

 

 

Bindið svo kjötið upp í rúllu.

 

 

Njótið svo útsýnisins. Þetta er fallegur biti. Og á eftir að verða alveg sérstaklega gómsætur. 

 

 

Raðið svo kolunum upp í "snák" eins og hérna að ofan. Kveikið svo upp í öðrum endanum. Þannig munu kolinn brenna allann daginn án þess að þið þurfið að hafa af því nokkrar áhyggjur. 

 

 

Eftir um 4-5 klukkustundir er kjötið tilbúið. Þó að það sé dökkt þá er það ekki brunnið, því fer fjarri. Þetta kallast börkur (bark) og er ótrúlega bragðgott! 

 

 

Svo er bara að byrja að skera kjötið niður. 

 

 

Hakkið það vandlega niður.

 

 

Blandið svo grillsósunni saman við kjötið.

 

 

Í raun bara eins mikið og þið viljið. 

 

 

Staldið við og njótið útsýnisins. Smakkið og saltið og piprið eftir smekk. 

 

 

Hakkið niður hvítkálið, gulræturnar og selleríið í matvinnsluvél. Skerið mangóið niður smátt og blandið vel saman ásamt majónesi og sýrður rjóma. Skafið börkinn af sítrónunni og saxið niður og hrærið saman við. Smakkið til með sítrónusafanum og salti og pipar.

 

 

 

Svo er bara að raða þessu saman. Slíkt er auðvitað leikur einn. Og næsta skref er bara að njóta með vinum og/eða vandamönnum.

 

 

Tjékkið endilega á bókinni minni. Hún er full af ljúffengum ævintýrum á grillið.


« Síðasta færsla | Næsta færsla »

Athugasemdir

1 Smámynd: Jónas Ómar Snorrason

Sæll Ragnar, sá á einhverri ameriskri kokkasíðu ráð við hvernig hægt sé að mýkja seiga, í þessu tilviki nautakjötsbita, svo þeir verði eins og besta steik. Brisketið virðist vera kjörið til þess. Mögulega þekkir þú þessa aðferð, sem er með eindæmum einföld, sníst um það að kafsalta bitann í korter á hverja þykktartommu, tvær tommur 30 mín etc. skola síðan og þerra fyrir steikingu. Hef ekki prufað þetta, en saltið hefur víst engin áhrif á bragðgæðin.  

Jónas Ómar Snorrason, 31.7.2016 kl. 17:19

2 Smámynd: Ragnar Freyr Ingvarsson

Þetta hljómar eins og þjóðráð. Það má í raun salta hvaða kjöt eða fiskbita sem er í skammastund til að mýkja. Hef séð breska sjónvarpskokka gera þetta við fisk - til að fá hann eins og nýjan aftur. Sel það þó ekki dýrara en ég keypti það!

Ragnar Freyr Ingvarsson, 14.8.2016 kl. 09:30

3 Smámynd: Jónas Ómar Snorrason

Talandi um salt Ragnar, sérstaklega varðandi saltfisk, er viss um að þú ert unnandi saltfisks. Reyndu að verða þér út um saltaðar þorsklundir(fann reyndar upp þá afurð) you aint see nothing yet fyrr en þú smakkar það eðal fiskmeti:)

Jónas Ómar Snorrason, 18.8.2016 kl. 10:30

4 Smámynd: Ragnar Freyr Ingvarsson

Hvar fæ ég svoleiðis?

Ragnar Freyr Ingvarsson, 25.8.2016 kl. 23:17

Bæta við athugasemd

Ekki er lengur hægt að skrifa athugasemdir við færsluna, þar sem tímamörk á athugasemdir eru liðin.

Innskráning

Ath. Vinsamlegast kveikið á Javascript til að hefja innskráningu.

Hafðu samband