Dásamleg Porchetta Italiana með smjörsteiktu fennel og svínasoðsósu

Þetta er uppskrift úr bókinni minni sem kom út fyrir jólin. Það eru margar ljúffengar uppskriftir í bókinni en þessi er í sérstöku uppáhaldi! Ég er búinn að elda hana nokkrum sinnum síðan bæði með og án svínalundarinnar - og ég lofa að hún gerir gæfumuninn!

 

Ég fékk hugmyndina að því að elda þennan ótrúlega ljúffenga rétt þegar ég heimsótti slátrarann í Saluhallen í Lundi. Þar sá ég upprúllaða svínasíðu og í gegnum bitann var stungið skilti sem á stóð PORCHETTA. Og þetta hafði ég ekki séð áður! Ég var reyndar á höttunum eftir einhverju öðru en nokkrum dögum síðar lagðist ég í heimildavinnu um þennan stórgóða rétt og varð spenntur – enda eiginlega ekki annað hægt. Uppskriftina setti ég saman eftir að hafa viðað að mér upplýsingum héðan og þaðan af netinu og úr skruddunum mínum. Og ég varð ekki svikinn. Ég fór næstum því að gráta þegar ég smakkaði þennan rétt í fyrsta sinn. Nú gæti ég hreinlega hætt að elda – hátindinum væri náð.

 

Dásamleg Porchetta Italiana með smjörsteiktu fennel og svínasoðsósu

3 kg svínasíða

1/2 kg svínalund

börkur af einni sítrónu

3 msk jómfrúarolía

3 msk marsala-vín

1 msk fennelfræ

2 msk hökkuð salvía

2 msk hakkað rósmarín

salt og pipar

2 greinar rósmarín

Mirepoix (laukur, sellerí og gulrætur)

 

3 fennelhausar

 

 

Skolið af svínasíðunni og þerrið. Skerið í puruna eða fáið kjötkaupmanninn til að afgreiða það fyrir ykkur.

 

 

 

Flysjið utan af einni sítrónu – takið bara börkinn en ekki hvíta lagið þar sem það er biturt á bragðið. 

 

 

Nuddið marsala-vínínu inn í kjötið, því næst olíunni og svo öllu kryddinu og sítrónuberkinum. 

 

 

Leggið síðan svínalundina á miðja síðuna og rúllið henni saman. 

 

 

Bindið saman með þræði og leggið rósmarín undir bandið. 

 

 

Bakið við 170 gráður í 3-4 klukkustundir á beði af mirepoix (laukur, sellerí og gulrætur).

 

 

 

Berið fram með t.d. smjörsteiktu fennel og einfaldri soðsósu gerða úr svínasoði sjá bls. 315.

 

 

Skerið fennel niður í sneiðar og steikið í 100 g af smjöri við lágan hita þangað til að hann hefur tekið fallegan gullinn lit og smakkast og ilmar dásamlega! 

 

 

 

Seinast þegar ég var með þetta á borðum drakk ég þetta ljúffenga vín með Monte Garbi Ripasso frá því 2010. Monte Garbi Ripasso frá því 2009. Þetta vín er gert úr blöndu að þremur mismunandi þrúgum með Corvína þrúguna í aðalhlutverki. Vínið er framleitt á ekrum í  kringum Feneyjar. Og þetta er sannarlega gott vín, dökkt í glasi, ilmur af dökkum ávexti og er kraftmikið og bragðgott. Þetta vín sveik ekki áður og gerði það heldur ekki í þetta sinnið. Get hæglega og vandræðalaust mælt með þessu víni. 

 

 

Núna er sko kominn tími til að njóta!

 

Verið ávallt velkomin á síðuna mína á Facebook! The Doctor in the Kitchen! 

Athugasemdir

[Nanna Gunnarsdóttir (IP-tala skráð) 15.2.2014 kl. 22:45]

Þetta er svo girnilegt að maður nánast slefar, svo lækkert sem það nú er.

En væri hægt að nota eitthvað annað en marsalavín?

[Nanna Gunnarsdóttir (IP-tala skráð) 5.3.2014 kl. 13:11]

Nú erum við búin að prófa og erum svolítið á báðum áttum með útkomuna, fannst fennikubragðið að kjötinu allt of ráðandi og steikingartíminn of langur, reyndar viljum við hafa svínakjöt rósbleikt svo það liggur nú örugglega í því.

Við erum hins vegar ákveðin í að prófa þetta aftur, þá með kryddfyllingu

þar sem hvítlaukur, smávegis rauðlaukur, parmesan og sítróna verður í aðalhlutverki,

ásamt að sjálfsögðu góðum, svörtum og nýmöluðum pipar. Þá held ég jafnvel að ég myndi heldur nota rauðvín en marsalavínið.

Samt gaman að prófa þetta, alltaf gaman að fara út fyrir rammann!